SAWER PANGANTEN

SAWER PANGANTEN

(KUNA SARI)

Nyukcruk galur ti karuhun

Natar lacak parawali

Nyambuang ka balarea

Titinggal ti nini aki

Ngawaris kabudayaan

Seni Sunda sawer asli

(Kidung)

NEDA AGUNG CUKUP LUMUR

NEDA JEMBAR PANGAKSAMI

BILIH AYA KALEPATAN

WIREH AYEUNA SIM KURING

NYAWER ANU PANGANTENAN

NYANGGAKEUN MUGI DITAMPI

(Pangapungan)

KU HIDEP MUGA DITUNGKUS

PEPELING TAWIS KAASIH

PIGEUSANEUN HIDEP MULYA

NGARANDAPAN LAKI RABI

NGAMUDI  NA RUMAH TANGGA

SANGKAN PANGGIH TENGTREM ATI (2x)

KA  GEULIS PUPUTON QOLBU

MUGA HIDEP SING NASTITI

SABAR DINA RUMAH TANGGA

KA PANUTAN SING GUMATI

TUTURKEUN DUNYA AHERAT

KITU KAWAJIBAN ISTRI (2x)

(Payo)

KA ASEP OGE PON KITU

DANGUKEUN IEU PEPELING

SIMPEN NA MANAH NU JEMBAR

AYEUNA MAH BEDA DEUI

HENTEU CARA HIDEP LAGAS

TEU AYA ANU MEREDIH

TI WANGKID IEU KA PAYUN

ASEP KEDAH TAKI-TAKI

NYUBADANAN KAWAJIBAN

NGURUS NGATUR LAKI-RABI

ANU KADADA KAIGA

GEUSAN ASEP HIRUP MUKTI

SAUR ROSULULLOH ESTU

REJEKI MAH TETEP PUHIT

KAWAS AREK HIRUP LANA

TAPINA KUDU SABANDING

JEUNG IBADAH NU TONG  PEGAT

SING KAWAS AJAL REK TEPI

APA NYAWER TEH SAKITU

MUGIA HIDEP ANAKING

RUNTUT RAUT SAUYUNAN

KA CAI JADI SALEUWI

KA DARAT JADI SALEBAK

PAREK RIJKI JAUH BALAI

RUN TURUN JATI RAHAYU

RAHAYU MANJING WALAGRI

MUGA BAGJA SALAWASNA

PINARENGAN RIDO GUSTI

GINANJAR SAPAPAOSNA

AMIN YA ROBBAL ‘ALAMIN