BAHAN KULTUM
DUIT SAJUTA
(DU’A, USAHA, IMAN, TAQWA, SABAR,
JUJUR, TAWAKAL)
Ibu rumah tangga bakal
ngaraos tenang lamun ngadaduhan duit sajuta. Resiko dapur moal kurat karet.
Rencang sangu sabulaneun mah sigana bakal kagaleuh, moal kudu nganjuk
ngahutang.
Pon kitu, Manah/hate
bakal ngarasa tengtrem, ayem, tumaninah lamun dina diri urang ngagaduhan
tabeat, sipat, kadaek nu mangrupa duit
sajuta.
DUIT SAJUTA teh akronim atawa pondokna tina du’a, usaha, iman, taqwa,
sabar, jujur, tawakal.
D – Du’a : mangrupa
usaha batiniah. Urang diparentah pikeun menta ka Alloh margi mantenna maha
beunghar, maha ngadangu, maha uninga kana kaperyogian urang. (Ud’uunii
astajiblakum), prak menta ka kami, kami nu bakal ngaijabahna . oamt ulah menta
ka salian ti Alloh, margi kalebet pagawean syirik, nu pasti bakal nyilakakeun
dunya aherat.
U – Usaha : mangrupa usaha lahiriah. Manusa diwajibkeun
ihtiar pikeun nyumponan sagala nu dipikabutuhna. Boh kabutuh urusan dunya boh
kabutuh urusan aherat (ibadah) kudu ditarekahan ku cara usaha anu soson-soson.
Ulah leleda, ulah mumul, tur puraga tamba kadenda.
I – Iman : nyaeta kayakinan nu nyangkaruk dina qolbu
yen sagala terekah nu dibarengan ku du’a bakal disubadanan ku Alloh SWT. Margi
manten-Na pisan nu maha welas maha asih. Yakin mung Alloh nu wajib disembah
sareng mung ka Alloh nyuhunkeun pitulung.
T – Taqwa :
darajat nu pangmulyana disagedengeun Alloh. Jalmi nu kaancikan sipat mutaqin
bakal ati-ati dina lumampah sabab aya kasieun bisi sagala rengkak polahna
mengpar tina jalan Alloh. Jalma nu taqwa bakal ikhlas, tumampi, tur
ngalaksanakeun sagala parentah nu Maha Kawasa. Sami’na wa atho’na, ngadangu
sarta taat.
Sa- Sabar : bisa
nahan diri tina rupaning hal nu tumiba. Jalmi sabar bakal tenang dina mayunan
sagala kajadian sabab pinuh ku kayakinan yen sagala perkara eta ti Alloh SWT.
Jalmi sabar henteu cicing, tapi bakal tetep narekahan pikeun ngungkulan hiji
masalah. Sabar enggoning ibadah, sabar pami mayunan musibah, sabab mayunan
kahirupan dunya, sabar tina maksiat, nahan diri sangkan teu tigebrus kana
maksiat.
Ju – Jujur : teu miboga sipat curaling. Dina kaayaan
kumaha bae panceg kana pamadegan anu bener. Ngadek sacekna, nilas saplasna, teu
ponteng ka nu koneng, teu cueut ka nu hideung. Mun beureum disebutkeun beureum.
Manah, letah jeung lampah saluyu (Qoulan sadiidan, nyarita anu bener). Mun
salah ditepikeun yen eta teh salah, mun bener teu ragu-ragu ditepikeun benerna.
Ta – Tawakal :
pasrah sumerah kana katangtuan Gusti. Hasil usaha jeung du’a sadayana
disanggakeun ka Gusti. Manusa mung darma usaha. Katangtuan aya di Manten-Na
(Alloh SWT.). jalmi nu tawakal bakal ayem tengtrem, teu galideur, moal pegat
pangharepan. Lamun hasil usahana anjeunna bakal syukuran, mun can hasil bakal
terus ngusahakeun dibarengan ku kasabaran.
Tidak ada komentar:
Posting Komentar